Inicio » Nacional, Liberación nacional, Movemento obreiro, Movementos sociais » A Conferencia Nacional ante o proceso constituínte dun novo referente político

A Conferencia Nacional ante o proceso constituínte dun novo referente político

O pasado sábado 12 de maio tivo lugar en Redondela unha Conferencia Nacional da Frente Popular Galega na que saíu reforzada a aposta pola construción dun novo referente político amplo en defensa dos interes das clases populares galegas. A nosa militancia recoñeceu a validez da proposta dos grupos comarcais e locais de base arredor do que se vén chamando “Novo Proxecto Común” e adquiriu o compromiso de participar de xeito democrático e construtivo nas asembleas abertas, considerándoas a garantía da representatividade para esta nova ferramenta que habemos de artellar entre todas e todos.

A única opción para que o novo proxecto sexa algo novo, unha alternativa real e representativa para as clases traballadoras e a sociedade galega, é que xurda en contacto coa cidadanía e a militancia de base. O outro camiño, o de prefabricar o proxecto a porta pechada, é máis do mesmo, repetirmos erros e esquemas dos que a sociedade xa comeza a manifestar o seu distanciamento e rexeitamento.

Así mesmo, a FPG, consciente da necesaria pluralidade de voces que ten de haber no novo proxecto, anima a todas as forzas políticas, movementos sociais e activistas individuais con sensibilidade de esquerda transformadora, a achegar a súa visión aos grupos de base, enriquecendo e fortalecendo a loita en prol dun novo modelo económico e social para o noso pobo.